اقتباسات خالدة من السينما المصرية

“Frankly, my dear, I don’t give a damn”

لطالما اجتذبت اقتباسات الأفلام قطاعات عريضة من الجمهور، فهي تلبي-أحيانا- رغبة المتكلم في إحداث تأثير ما على مستمعيه. هي ربما الأقوال المأثورة، تضرب بجذورها في عمق الثقافة العربية ومنطق خير الكلام ما قل ودل.

وخلافا لحال دول الشمال الناطقة بالإنجليزية حيث باتت بعض الجمل اللي يقولها ممثلون جزءا من الثقافة الشعبية وصيغ في اللغة المستخدمة كتابة وحديثا، إلا أن الحالة العربية تقف متأخرة نسبيا في درجة حفظها وترديدها لما يقوله بعض الممثلين من أقوال يصح نعتها بالـ “مأثورة”.

لذلك لا يستغرب المرء إطلاقا من الاهتمام اللافت الذي أبداه “معهد الفيلم الأمريكي (American Film Institute) وهو يؤسس لتاريخ مرئي للسينما أن يدعو مئات النقاد للتصويت على أفضل مئة اقتباس في السينما الأمريكية.

وقبل سنوات نشرت قائمة المعهد وعلى رأسها الجملة التي أضحت خالدة والتي نطقها كلارك جيبل في فيلم “ذهب مع الريح” وهي: 

Frankly, my dear, I don’t give a damn”

والتي يمكن ترجمتها إلى “بصراحة يا عزيزتي، هذا أمر لا يعنيني اطلاقا.”

وجدت قائمة إلكترونية لا أعرف من أعدها تحوى “أجمل الجمل في تاريخ السينما المصرية.”

في هذه القائمة  تقع الجمل الأشهر ربما ” جواز عتريس من فؤادة باطل” ليحي شاهين في فيلم “شئ من الخوف” ، ثم جملة مغمورة –لكنها معبرة- لحمدي أحمد في فيلم البداية “أستاذ .. هو أنت لامؤاخذة .. لامؤاخذة يعني في الكلمة .. اللهم احفظنا.. ديموقراطي ؟”

تمتد القائمة لتشمل أفلاما تتباين فيما بينها ليس فقط من حيث الجودة الفنية ولكن أيضا من حيث معني الجملة نفسها.

هنا يتفق محمود عبد العزيز (فيلم الكيف) مع محمد سعد (مجمل أفلامه) في نحت تعبيرات ومفردات شديدة الغرائبية في العامية المصرية.

لننظر إلى هذ الحوار القصير:

محمود عبد العزيز: احنا في عصر تفتيح المخ ..

يحي الفخراني: ومادام في عصر تفتيح المخ .. بتقفل مخك ليه بالهباب اللي بتشربه ده ؟

محمود عبد العزيز: بقفل!! ده أنا باداهبزه وداهرزه .. عشان يبرعش ويحنكش ويبقى آخر طعطعة

وفي سياق آخر يحاول الفخراني أن يحذو حذو أخيه فيلقي بجملته التاريخية: الشكرمون طاخ في الترالولي

هناك جمل أفلام تشير إلى قناعات شعبية ما، رغم أن الجمل جديدة ربما. من أمثلة هذه الجمل التي ربما تعبر عن قناعة راسخة لدي بعض المصريين  ما قاله نور الشريف في فيلم العار :

الحشيش لو حلال ادينا بنشربه و لو حرام ادينا بنحرقه

السياسة  حاضرة  بكثافة في الجمل أو أقوال الأفلام المأثورة.  فجملة هند صبري في عمارة يعقوبيان: البلد بقت قاسية أوي علي ولادها يا باشا، جملة سخيفة ولا أظن أن ترديدها يتعدي حاجز السخرية نظرا لمباشرتها وخطابيتها الممجوجة.

لكن تبهرني جملة أحمد زكي في الحب فوق هضبة الهرم وهو ينقد حال مثقفي البلد:

“كلهم كدابين و كلهم عارفين انهم كدابين و كلهم عارفين اننا عارفين انهم كدابين”

ولا يقف الانبهار عن جملة الحب فوق هضبة الهرم فهناك أيضا جملتي حسن البارودي في الزوجة الثانية

و اطيعوا الله و اطيعوا الرسول و اولي الامر منكم. أنت حتكفر يابني؟

هناك جمل تتعدد طرق استخدامها نظرا لجماهيريتها الكاسحة. فمثلا متى تستخدم الجملة الشهيرة لأحمد مظهر في فيلم رد قلبي وهي

ابن الجنايني بقي ظابط يا إنجي

لكن على أية حال يظل استخدام كلمة “مصر” في جمل الأفلام محفزا على التفكير. فالاستخدام يغلب عليه روح السخرية المرة

أنا موش شايف في مصر غير بيبان مقفلة-  محمد العربي في حمام الملاطيلي

وأكلم مين لما أحب أخاطب شعب مصر؟ واسلاماه

أو أن الاستخدام للتعبير عن لغة خطابية

عشان مصر تعيش أغلى الناس بتموت. ماجدة في العمر لحظة

أو لطرح فرضية ما عن مصر

مصر ميستخباش فيها سر لاكتر من سنة- يسرا في معالى الوزير

+++

يمكننا إذن أن نصنف أجمل الاقتباسات في السينما المصرية (بصورة تقريبية)، ويمكن أيضا توزيعها على حسب الموضوع (أقوال عن الحب، النساء، الرجال، الزواج ، الوطن).

أو يمكن أيضا رصد أجمل الجمل في فيلم معين. فمثلا رصدت هذه الجمل من فيلم الهلفوت (عادل إمام وإلهام شاهين)

-مكتوب على ورق الجرجير، يلطم فينا الصغير والكبير- وردة (إلهام شاهين)

-زمن  التصاوير خلص وكلو هيبقي على الطبيعة – عرفة “مشاوير”-(عادل إمام)

-كلو كلام، لكن وردة أول ما هتدخل عندي، سمعتها هتبقي زي سمعة مرات مأمور المركز بالظبط- عرفة مشاوير

-أنا أتجوز عرفة مشاوير ؟ المرحوم جوزي كان فراش في مدرسة أد الدنيا. وردة

وهذا مثال آخر من فيلم البيضة والحجر لأحمد زكي ومعالي زايد

وإذا سقط منكم لهفوري فكلكم لهفوري- أحمد زكي

دي جودة وكل برغوت على أد دمو- صباصي (إسماعيل صبري)

إلا الفلسفة دي  في أى حتة في الجتة؟  يعني لا قدر الله لو الواحد فلسفتو وجعتو، الوجع يبقي فين ؟ معالي زايد

ما أصعب المبادئ هذه الأيام- أحمد زكي

آه يا بختي المتعوس يروح البرد وييجي الناموس -معالي زايد

أنا بحارب الغلاء بالاستغناء – أحمد زكي

آل جبناكي يا حكومة تحمينا، حميتي النار وكويتينا- معالي زايد في البيضة والحجر 

بحسب هذه التقسيمة يمكن ببساطة نشر كتاب أو قاموس حول “جمل السينما المصرية” أسوة بكتابات عدة حول الأفلام الأمريكية والإنجليزية. والكتاب بهذه الطريقة سيكون جديدا في تدوين بعض إنجازات “الثقافة المرئية” ونقلها لشريحة واسعة من القراء.

+++

هذه هي بعض من الجمل الأجمل في السينما المصرية

 أهم حاجة الحماس أي كلام يتقال بحماس لازم يتسمع بحماس.. سعاد حسني في خللي الك من زوزو

زمن اللعب راح خلاص.. عادل امام في الحريف

مسيرها تروق و تحلي… احمد زكي في احلام هند وكاميليا

الناس الدنيا ساطلاهم من غير حاجة.. جميل راتب في الكيف

العدالة ليها رجلين تنصف المظلوم و تعاقب الظالم. أنتم عايزين عدالة برجل واحدة بس. عادل إمام في الغول

الحكومة مالهاش دراع عشان تتلوي منه كمال الشناوي في الارهاب و الكباب

العيب مش فيكم العيب في النظام. برايز في فيلم ثقافي

مشكلة ابويا انه مش قادر يصدق انه اعمي. شريف منير في الكيت كات

انا حاسس ان ربنا بيعذبني في الدنيا عشان شايل لي فرحة كبيرة قوي في الاخرة. حسين فهمي في الاخوة الاعداء

احنا في زمن المسخ. عادل امام في عمارة يعقوبيان

كلكم عايزين تبقوا فتوات؟ امال مين اللي حينضرب؟ توفيق الدقن في الشيطان يعظ

الحشيش لو حلال ادينا بنشربه و لو حرام ادينا بنحرقه. نور الشريف في العار

انا امي بتتخن من الجوع. عمرو سعد في حين ميسرة

 ده النيل و ده الهرم دي مصر ياعبلة. محمود ياسين في الصعود الي الهاوية

اللي اتعود يعيش اله صعب يعيش عبد. خالد صالح في الريس عمر حرب

انهم جياع يا عظمة السلطان و ينتظرون ساعة الخلاص. الناصر صلاح الدين

يا ولاد الكلب. نور الشريف في سواق الاتوبيس

احنا الاخوان الشيوعيين. محمود عبد العزيز في ثلاثة علي الطريق

الذين يحبون لا يتزوجون. نور الشريف في السكرية

مافيش حاجة مالهاش ذاكرة. عمرو واكد في جنينة الاسماك

ماشي يا بني ادميين . محمد سعد في اللمبي

الغازية لازم ترحل. البوسطجي

ابن الجنايني بقي ظابط يا انجي. احمد مظهر في رد قلبي

جاتكم القرف مليتو البلد. محمد هنيدي في جائنا البيان التالي

انا لو كنت بعلم كلاب كان زماني بقيت مليونير بس ياخسارة انا بتاع بني ادمين. نجيب الريحاني في غزل البنات

احنا لو رحنا الجنة مش حنلاقي حد نعرفه. عادل ادهم في الراقصة و الطبال

دقيقة واحدة تفرق يا امال. زكي رستم في نهر الحب

الرجولة ادب مش هز اكتاف. محمد سعد في الناظر

لكنك لا تفهم يا سلطان المسلمين الحطابون في الجبال النائية و الفلاحون في الحقول و العجائز حول نار المدفاة كلهم ينتظرون عودة ريتشارد بمفاتيح اورشليم. حمدي غيث في الناصر صلاح الدين

الكونياك مشروب البنت المهذبة. استيفان روستي في سيدة القصر

امك بس هي اللي تعرف مين ابوك. نبيلة عبيد في الاخر

اللي مالوش اهل الحكومة اهله. راقية ابراهيم في زينب

عليكي لعنة الفلاح خديها من قلب فلاح ابن فلاح . يوسف وهبي في الافوكاتو مديحة

انا مش شايف في مصر غير بيبان مقفلة. محمد العربي في حمام الملاطيلي

انت من الاحرار يا علي. كمال ياسين في رد قلبي

مش كل واحد قراله كتابين حيهد الدنيا و يبنيها. شعبان عبد الرحيم في مواطن و مخبر و حرامي

المجتمع مش غفور رحيم. عبد الوارث عسر في شباب امراة

شعبي يقول عليا ايه؟. احمد زكي في ايام السادات

انا عندي حبوب للضحك و حبوب للكلام و حبوب للسعادة بس ماعنديش حبوب للحزن عشان ده موجود طبيعي. عادل امام في الانسان يعيش مرة واحدة

الجواز مش للغلابة اللي زينا. احمد زكي في الحب فوق هضبة الهرم

الافكار ليها اجنحة ماحدش يقدر يمنعها توصل للناس. سيف عبد الرحمن في المصير

كنت مغفلا. عبد المنعم مدبولي في الحفيد

انتي مادخلتيش دنيا؟ ولا دخلتي و بتستعبطي؟ عادل ادهم في ثرثرة فوق النيل

ماتبسطهاش اكتر من كده. عبد السلام النابلسي في شارع الحب

انا حلمي كان صغير و فضل يصغر يصغر لحد ما اختفي و مابقتش اشوفه. علاء ولي الدين في عبود علي الحدود

بلدي قوي يا حسين. اشاعة حب

انا بقيت زي الجزيرة اقرب واحد ليا علي البر التاني. محمود ياسين في الجزيرة

انا مشيت ورا قلبي انجرحت..مشيت ورا عقلي انجرحت اكتر. بوسي في حبيبي دائما

اللي يشوف البلد دي من فوق غير اللي يشوفها من تحت. عادل امام في طيور الظلام

عيش و سبني اعيش يا باشا. طلعت زكريا في التجربة الدنماركية

دم الدهاشنة في الكوباية يا رجالة. شئ من الخوف

كلنا مجرمين و كلنا ضحايا. كمال الشناوي في الكرنك

واحد مصاحب علي علوكة و اشرف كخة عايزينه يطلع ايه؟ محمد سعد في اللي بالي بالك

كلنا فاسدون لا استثني احدا حتي بالصمت العاجز. احمد زكي في ضد الحكومة

ماحدش بياكلها بالساهل. نجمة ابراهيم في ريا وسكينة

بقي معقولة ابن الحاج عبد التواب مايعرفش اصول التخزين؟ التخزين كان من اختصاص الدفاس و ابو دقشوم.  فيلم العار

من النهارده مافيش حكومة. انا الحكومة. احمد السقا في الجزيرة

قول ورايا يا يحيي..مصر حتفضل غالية عليا.. محسن محيي الدين في وداعا يا بونابرت

و اكلم مين لما احب اخاطب شعب مصر؟ واسلاماه

ممكن توقف لي القطر؟ يسرا في المنسي

مستر اكس هاز نو اند. فؤاد المهندس في عودة اخطر رجل في العالم

اجمل حاجة في الدنيا ان مراتي تبقي عشيقتي و عشيقتي تبقي مراتي. سعيد عبد الغني في حبيبي دائما

ياعزيزي كلنا لصوص. محمود عبد العزيز في ياعزيزي كلنا لصوص

ماتامنش لاي ست في الدنيا غير امك. ولو ابوك طلقها ماتامنلهاش. محمد هنيدي في صعيدي في الجامعة الامريكية

كلنا ولاد نعيمة الماظية. سعاد حسني في خللي بالك من زوزو

لازم يكون فيه واحد مسئول يخللي الباقيين مش مسئولين. سيف ابو النجا في امبراطورية ميم

عشان مصر تعيش اغلي الناس بتموت. ماجدة في العمر لحظة

احنا صغيرين قوي ياسيد.. لا ياامي احنا كبار بس مش عارفين نشوف نفسينا. سناء جميل و احمد زكي في اضحك خللي الصورة تطلع حلوة

بتشجع الاهلي ولا الزمالك يا دياب؟

بشجعك انت يا زينهم بيه.. احمد زكي في الامبراطور

الراحة مابتجيش غير بطلوع الروح. شكري سرحان في اللص و الكلاب

احنا صناع الارادة. نور الشريف في الرقص مع الشيطان

الحرامية لما بيتخانقوا مع بعض الحكومة بتطلع منها. عادل امام في اللعب مع الكبار

ايه اللي جاب القلعة جنب البحر؟ محمد سعد في عوكل

الشئ اللي ماينفعش نعمله قدام الناس يبقي ماينفعش نعمله خالص.  سعاد حسني في اميرة حبي انا

و رحمة ابويا تعبت. مني زكي في سهر الليالي

في بلدنا ابن الضابط لازم يطلع ضابط و ابن تاجر المخدرات لازم يطلع تاجر مخدرات. كريم عبد العزيز في خارج علي القانون

ابن الاراجوز بقي باشا. عمر الشريف في الاراجوز

الحب عند الصعايدة حب صعب. ميرفت امين الحب قبل الخبز احيانا

انا بني ادم ياسي محمد. فاطمة رشدي في العزيمة

حتروح فين من ايامك يا ايوب؟ تحية كاريوكا في اه يابلد اه

علي ايامنا البنات كانوا بيتمنوا اي حاجة فيها شعر و ريحتها سجاير. هدي سلطان في عودة الابن الضال

السلم نايلو في نايلون و العتبة جزاز و اللي يخون بلده و اهله يستاهل الحرق بجاز. فؤاد المهندس في العتبة جزاز

انتم اول ناس نطت من المركب و هي بتغرق.. انت و اللي زيك من اللي كسبوا الدنيا و خسروا نفسهم. احمد زكي في الحب فوق هضبة الهرم

الراجل اللي يسلم نفسه لواحدة ست زي الست اللي تسلم نفسها لراجل مافيش فرق. عبد الوارث عسر في شباب امراة

كلكم اقطاي. تحية كاريوكا في واسلاماه

السجاير حتخسر صحتك ماتخليهاش كمان تخسر اخلاقك. فاتن حمامة في امبراطورية ميم

ياما بيوت مليانة رقاصات مابيشتغلوش في كباريهات. سامية جمال في الرجل الثاني

انتي اجمل مكنة شفتها في حياتي. فؤاد المهندس في عائلة زيزي

سلم لي ع البتنجان. نادية الجندي في الباطنية

ابكي انزف اموت و تعيشي يا ضحكة مصر. احمد مرعي في اغنية علي الممر

انا خايف التعويرة تفضل تكبر تكبر لحد ماتضيق علينا المكان. محمد سعد في كركر

عندما تتلاقي الحتمية البيولوجية مع الحتمية الايديولوجية عندها تتحقق حرية الانسان. نور الشريف في قلب الليل

ده ما بعتبروش معتقل بالمعني المعروف لكنه مكان للتامل و الاستجمام الفكري. محمود عبد العزيز في البرئ

هما بيعملوا فيكو كده ليه؟ عشان احنا اللي فهمنا يا سبع الليل.

احمد زكي و ممدوح عبد العليم في البرئ

انت فاتك قطر الجواز؟ انا فاتتني قطارات كتير. يسرا و عادل امام في المنسي

اللي عايز يوصل حيعرف. ليلي علوي في الوان السما السابعة

لما بكون معاك بحس ان الابواب كلها بتتفتح . ميرفت امين في زوجة رجل مهم

كانت أيام ما تتعوضش كان عندنا قوة وقلب عشان كنا رجالة ووقفنا وقفة رجالة وأخرتها دي النتيجة اللي وصلنالها قاعدن بنشكي و نولول زي النسوان

. محمود المليجي في الارض

طظ. حمدي احمد في القاهرة 30

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s